شحــتوت الغفــير

تبدأ الحكاية فى مكان مش على الخريطة أكيد والصورة فيها عبد من عباد الله اسمه شحتوت محدش

فاكراسمه ده كان من الفقر و لا الحسود والمهنة غفير و الباقى جى أكيد.


فكر العبد لله شحتوت الغفير ان يرسل فاكس و لكنه فى نهاية الأمر لم يستطع تحديد الجهه و لا عنوان المرسل اليه و عليه قرر ان يتوجه بالدعاء بعد ان خلص بنيته لمالك الملك و الملكوت بعد انقطاع أسباب الاتصال به فى الكون فدعا يقول:


لله الامر من قبل ومن بعد،


عبدك الفقير شغال غفير رغم التمنى كان سفير و يرفع أكفه بالدعاء فلا تردهما صفر اليدين:


تغير الزير وفرشة حصير ساعة العصارى مع شوية طيب وبطانية فى البرد الشديد ولقمة هنية تكفى العيال الكتير ورحلة لبيتك قبل الرحيل واخد أم العيال ولا يبقى ده كتير. عموما" اللى عندك كتير وأنا طمعى فى وجه كريم.
يارب علينا التفكير و دبرها يا كريم.


شحتوت الغفير.


وفعلا جاء الرد زى ما أتمنى شحتوت الغفير فى صورة عقد بالخليج سافر بيه بعد ما ودع أم العيال و أولاده الغاليين ووصاهم وصية يمكن تكون ليوم الدين بأنهم يكونوا على الوعد محافظين فى الصلاة و العلم و أمهم و بخاصة للأبن الكبير واللى كان يفوق أخواته بسنين.


و بعـــــــــد مرور سنين فى العدد مش كتير........


قابل المواطن شحتوت الغفير صاحب له في الله من سنين واللى سأله كان فين و فاكسه ياترى كان محدد لمين؟ وذلك بعد ما رجع من الغربة بالفلتر والحصير وكمان( التى. فى. )


فأخبره شحتوت الغفير المتغرب من سنين رحت هناك فى بلد بعيد من بلاد مالك الملك و يوم الدين.
لفيت وشقيت و عشت فى أنين.و أنكويت يا صاحبى بنار البعد و الحنين وكنت باخد ملاليم وكانت النيه ملايين؟


لكن الحمد لله فى الأخر قدرت أغير الزير و أجيب الحصير و بعلم فى العيال الكتير لعلى أغير حظهم التعيس و النيه يكون فيهم السفير و الطبيب مش زى ابوهم يبقى لهم فى البلد طين لعل و عسى ماهو ربك عنده كتير.. وعلى فكرة منستش أجيب ( التى.فى. ) .....؟!


ثم جلس المواطن شحتوت الغفيرو سط أولاده و أم عياله على الحصير بعد ما وصل الفلتر بالزير؟ و هو مش عارف يعمل اية فى التى.فى.؟؟؟و لما أعجزته الحيل قرر رفع أكفه من جديد بدعاء طمعان فيه بالخير الوفير فدعا يقول:


من العبد الفقير بعد ما أتغرب سنين رجع تانى غفير و فشلت كل محاولاتى لتغيير الزير ؟!


يارب العباد أنت ربى فلا ترد طلبى.


يارب شفت فى الغربة حنفية فيها مية كتير و صابون و كمان ليف !


و أنا أعلم ان فى الأخرة فيه كتير. بس العيال عاوزين .و كمان الفلتر منفعش يتوصل بالزيرلان الميه فيها دود كتير ؟! وللا( التي.فى. ) طلع لازم له قال كهربة و ســلك و فيش؟!


فيارب العباد و المسـتضعفين يســر لهم بيعة يمكن بتمنهم نقدر نعيش و لا انكتب على الجبين الشقا و برضه مفيش!


عبدك خذلنى و اروح لمين لما أشـتريت الفلتر و الحصير( التي.فى. ) كانوا العيال وحشونى و الباقى فى العمر مش كتير رغم كان فاضل فى الأمانى المروحة و السـرير..! فيارب سهـل عليا بعقد جدبد ورضـا منك يطرح البركة فى العيال الصغير قبل الكبير واجعلهم فى الدنيا بعلمهم مسعدين و أهديهم ٌقادر يا كريم.


شحتوت الغفير


فأستجاب له ربه ماهو ربك أصله ودود كريم بعباده رحيم.





وبعــــد مرور ســنين .....رجع شحتوت بعد العقـد الثانى و قد يكون الأخير حيث عاد هفتان مريض و لكنه حقق المرة دى كتيير من تعليم العيال لحد المروحة و السرير ! وجلس من فراش المرض المرير يدعو ربه و هو يشعر انه قـد يكون هو الدعاء الأخير..
فبدأه يقـول:
" و اذا جاء أجلهم لا يستأخرون ساعة و لا يستقدمون"


يارب المرة دىدعائى فيه طلبات كتير


أولها: تغفر لى وتصفح عن الذنوب الكتير


و تانيها:أم العيال والعيال لم شملهم دايما" أجمعين واسترهم دنيا و دين و أبعد عنهم كل شيطان رجيم و أجعلهم فى حماك يا كريم و أكرمهم بالعلم و الدين واكفيهم شر الناس الطامعين فى الفلتر أو فى الحصير..!؟ و ختاما أتقدم بكل تواضع وراسى فى الطين ... بطلب أخير... قصر صغير فى الأخره ألم فيه الحبيب و القريب وحتى الغريب بحق شقا السنين و المشى على صراطك المستقيم وجنينة صغيرة فيها ما نشتهيه واللى انحرمنا منه
واللى ماشفتهوش العين وخدم و حشم ولو مش كتير...؟!


ولك الأمـر من قبل ومن بعد يا مالك الملك و الملكوت.


العبد لله المريض
شـحتوت الغفـير


ملحوظة و للعلم:


مات شـحتوت الغفـير فى يوم ثلاثاء مرير تجمع فيه الأهل و المحبين و لم يتجاوز عددهم الثمانية و الثلاثين و الذى يساوى عمره عند الرحيل يا مفارقات الزمن العجيب...!و العيال كبروا وحتيجى حكايتهم بعدين و أمهم فى وسطهم فى أمان و سكن سكين ما هو أصل العيال حافظين الجميل.و دخلت الكهربة و بقوا حوالين التى.فى. متجمعين دى أخبار ودى مسرحية ودا برنامج دين و فى الحر كانوا يشغلوا المروحة و يترحموا على شحتوت الغفير و كمان بقى فيه مية فى حنفية وصابون و كمان ليف.الحمد لله على كل شيئ و كفاهم ربك شـر الطامعين و حلمت أم العيال بشـحتوت سفـير فى قصر كبير و جنينة و عز عزيز..فاللهم ارحــم شحــتوت الغفــير.